बागमती, गण्डकी र कर्णाली प्रदेशका पहाडी तथा हिमाली भागमा आज भारी वर्षाको सम्भावना छ। देशभर मनसुनी वायुको प्रभावले यो अवस्था आउने जल तथा मौसम पूर्वानुमान महाशाखाले जनाएको छ।
महाशाखाका अनुसार हाल मनसुनको न्यून चापीय रेखा औसत स्थानमा छ। कोशी प्रदेशको तराईबाहेक अधिकांश भागमा सामान्यदेखि पूर्ण बदली छ। कोशी, बागमती र कर्णाली प्रदेशका केही स्थानमा मध्यम वर्षा भइरहेको छ। गण्डकी, लुम्बिनी र सुदूरपश्चिम प्रदेशका एकदुई स्थानमा पनि मध्यम वर्षा भइरहेको छ।
आज दिउँसो हिमाली र पहाडी भेगमा सामान्यदेखि पूर्ण बदली रहनेछ। तराईमा आंशिक बदलीको सम्भावना छ। हिमाली र पहाडी भेगका केही स्थानमा मेघगर्जन र चट्याङसहित मध्यम वर्षा हुनेछ। बागमती, गण्डकी प्रदेशका तराईका केही स्थानमा पनि मध्यम वर्षाको पूर्वानुमान छ। कोशी, मधेस, लुम्बिनी र सुदूरपश्चिम प्रदेशका तराईका एकदुई स्थानमा पनि मेघगर्जन र चट्याङसहित मध्यम वर्षा हुन सक्नेछ।
आज राति देशभर सामान्यदेखि पूर्ण बदली रहनेछ। कोशी, बागमती र गण्डकी प्रदेशका हिमाली तथा पहाडी भागका केही स्थानमा मध्यम वर्षाको सम्भावना छ। लुम्बिनी, कर्णाली र सुदूरपश्चिम प्रदेशका हिमाली तथा पहाडी भागका केही स्थानमा पनि मध्यम वर्षा हुन सक्नेछ। तराईका केही स्थानमा पनि मेघगर्जन र चट्याङसहित मध्यम वर्षाको सम्भावना छ।
महाशाखाले भारी वर्षाले गेग्रान, बाढीपहिरो तथा भूक्षयको जोखिम बढाउने जनाएको छ। प्रतिकूल मौसमले दैनिक जनजीवन, कृषि, स्वास्थ्य, पर्यटन, पर्वतारोहण, सडक र हवाई यातायात प्रभावित हुन सक्नेछ। आवश्यक सावधानी अपनाउन महाशाखाले अनुरोध गरेको छ।
