सिंहदरबारभित्रै नवजात शिशु च्यापेर पुगेका सुजन बिकलाई गृहमन्त्री सुदन गुरुङले भेटेर अस्पतालको लापरबाहीमा दोषीलाई कडा कारबाहीको प्रतिबद्धता जनाएका छन्। तीन महिनादेखि सडक संघर्षमा होमिएका बिकले आफ्नी श्रीमतीको अकाल मृत्यु अस्पतालको गम्भीर त्रुटिका कारण भएको भन्दै न्याय मागेका हुन्।
रत्ननगर नगरपालिकाका बिकले सुत्केरी अवस्थामा अस्पतालले उचित हेरचाह नगर्दा श्रीमती गुमाउनुपरेको र शिशुको भविष्य संकटमा परेको भन्दै सरकारसँग भावुक गुहार मागेका थिए। पीडित बिक र शिशुको कारुणिक अवस्था देखेर गृहमन्त्री गुरुङले तत्काल छानबिनको निर्देशन दिएका छन्।
‘राज्य नागरिकको अभिभावक हो। अस्पतालको लापरबाहीले कसैले ज्यान गुमाउनुपर्ने अवस्था आउनु अत्यन्तै दुखद छ,’ गृहमन्त्री गुरुङले भने, ‘यो घटनाको गहिराइमा पुगेर छानबिन गरिनेछ र दोषीलाई कडाभन्दा कडा कारबाही हुनेछ।’
गृहमन्त्री गुरुङले मन्त्रालयका अधिकारीहरूलाई तत्काल छानबिन समिति गठन गरी सत्यतथ्य विवरण यथाशीघ्र बाहिर ल्याउन निर्देशन दिएका छन्। छानबिन प्रतिवेदनका आधारमा दोषी देखिएका जो कोहीलाई पनि कानुनी दायरामा ल्याइने प्रतिबद्धता उनले व्यक्त गरे।
