१० लाख ३८ हजार ८०८ थान सवारी चालक अनुमतिपत्र र २ लाख ४७ हजार ४३ थान राहदानी हुलाकमार्फत ढुवानी भएको छ। हुलाक सेवा विभागका अनुसार, यीमध्ये क्रमशः १ हजार ९९ थान लाइसेन्स र ८ हजार ६६९ थान राहदानी सेवाग्राहीको घरदैलोमै पुर्याइएको छ।
सरकारी सेवा नागरिकको घरदैलोसम्म पुर्याउने उद्देश्यले हुलाकलाई ‘सरकारी कुरियर सेवा’का रूपमा विकास गर्ने अभियानले गति लिएको छ। महानिर्देशक मनमाया भट्टराई पङ्गेनीका अनुसार, हुम्लाबाहेक ७६ जिल्लामा सरकारी कागजात घरमै पुर्याउने योजना कार्यान्वयनमा छ।
कर्णाली प्रदेशमा सवारी चालक अनुमतिपत्र घरदैलोमै पुर्याउन समझदारी भई सेवा सुरु भएको छ। सुदूरपश्चिममा पनि यस्तै सेवा विस्तारबारे छलफल भइरहेको छ। नेपाल खुला विश्वविद्यालयसँग सम्झौता गरी शैक्षिक प्रमाणपत्र घरदैलोमै पुर्याउन थालिएको छ। त्रिभुवन विश्वविद्यालयसँग पनि यस्तै सम्झौताको तयारी छ।
स्वास्थ्य क्षेत्रमा १७ अस्पतालका १ हजार ४८० प्रयोगशाला नमूना ढुवानी भएको छ। स्वास्थ्य, शिक्षा तथा सूचना केन्द्रसँग ४४ हजार १८४ थान सामग्री र स्वास्थ्य बीमा बोर्डसँग २८ जिल्लामा १३० बोरा स्वास्थ्य सामग्री हुलाकमार्फत ढुवानी गरिएको छ। नेपाल टेलिकमका सामग्री र भूमि व्यवस्था तथा अभिलेख विभागका जग्गाधनी पुर्जासमेत हुलाकमार्फत वितरण भइरहेको छ।
महानिर्देशक पङ्गेनीले देशको ठेगाना प्रणाली व्यवस्थित गर्नुपर्ने बताइन्। बसाइँसराइ गर्दा नयाँ ठेगानाबारे हुलाकलाई जानकारी दिनुपर्ने उनको सुझाव छ। सवारीसाधन र सूचना प्रविधिका साधनको अभावले सरकारी कुरियर सेवा विस्तारमा चुनौती थपिएको छ।
डाँक मार्गको पुनरावलोकन, सात अंकीय हुलाक सङ्केत प्रणाली, आन्तरिक निगरानी प्रणालीको स्तरोन्नति, वैदेशिक हुलाक सेवामा बिदाका दिनमा पनि सेवा, त्रिभुवन विमानस्थलमा द्रुत चेकजाँच र वायुसेवा कम्पनीहरूसँगको सहकार्यले हुलाक सेवालाई आधुनिक बनाउने प्रयास भइरहेको छ।
सरकारको नीतिअनुसार ५० हुलाक कार्यालयलाई ‘स्मार्ट हुलाक’मा रूपान्तरण गरिनेछ। सुरक्षण मुद्रण केन्द्रसँगको सहकार्यमा ३४ लाख ७४ हजार हुलाक टिकट छापिएको छ।
