सुनसरीको धरानबाट प्रहरीले ज्योति शाहीलाई पक्राउ गरी १ अर्ब ३ करोडभन्दा बढीको हुण्डी कारोबारको पर्दाफास गरेको छ। केन्द्रीय अनुसन्धान ब्यूरो (सीआईबी) ले गोप्य सूचनाका आधारमा शाहीलाई नियन्त्रणमा लिएको हो।
शाहीले ‘शाही मनि ट्रान्सफर’ नामक फर्म दर्ता गरी कृषि विकास बैंक, सेन्चुरी कमर्सियल बैंक, ग्लोबल आइएमई बैंकलगायत ५२ वटा बैंकका खाता प्रयोग गरी रु. १ अर्ब ३ करोड ८४ लाख ७५ हजार ८४५ बराबरको कारोबार गरेको अनुसन्धानबाट खुलेको छ।
विदेशमा आर्जन गरेको रकम अनौपचारिक माध्यमबाट नेपाल भित्र्याई स–साना रकममा विभाजन गरी कनेक्ट आइपीएसलगायतका विद्युतीय माध्यममार्फत असम्बन्धित व्यक्तिहरूको बैंक खातामा पठाउने गरेको पाइएको छ।
शाहीविरुद्ध हुण्डीसम्बन्धी कसुरमा थप अनुसन्धान भइरहेको सीआईबीका प्रवक्ता अनुप शमशेर जबराले जानकारी दिए। घटनामा संलग्न अन्य व्यक्ति र कारोबारबारे थप अनुसन्धान भइरहेको प्रहरीले जनाएको छ।
