दिल्लीको जन्तरमन्तरमा परीक्षा प्रश्नपत्र लिक र भ्रष्टाचारविरुद्ध प्रदर्शनकारीमाथि प्रहरीले लाठीचार्ज गरेको छ। ककरोच जनता पार्टी (सिजेपी) का हजारौं समर्थकले केन्द्रीय शिक्षामन्त्री धर्मेन्द्र प्रधानको राजीनामा माग्दै संसद भवनतर्फ मार्च गरेका थिए।
सुरक्षा घेरा र बार तोडेर अघि बढेका प्रदर्शनकारीलाई नियन्त्रणमा लिन प्रहरीले लाठीचार्ज र अश्रुग्यास प्रयोग गर्यो। झडपमा केही प्रदर्शनकारी र सुरक्षाकर्मी घाइते भए। यसैबीच, सिजेपीका प्रतिनिधिले स्वास्थ्यमन्त्री जेपी नड्डालाई भेटेर आफ्ना माग राखे।
सिजेपी नेता सौरभ दास र आशुतोष राँकाले मन्त्री नड्डालाई भेटेका हुन्। उनीहरूले शिक्षामन्त्रीको राजीनामा, सोनम वाङचुकको तत्काल रिहाइ र नीट-यूजी २०२६ का परीक्षार्थीका परिवारलाई प्रतिव्यक्ति एक करोड भारतीय रुपैयाँ क्षतिपूर्तिको माग गरे। दासका अनुसार मन्त्री नड्डाले भाजपा नेतृत्वसँग छलफल गर्ने आश्वासन दिएका छन्।
गत मे महिनामा राष्ट्रिय मेडिकल प्रवेश परीक्षाका प्रश्नपत्र लिक भएपछि लाखौं विद्यार्थी प्रभावित भएका थिए। अनशनरत कार्यकर्ता सोनम वाङचुकलाई प्रहरीले अस्पताल भर्ना गरेपछि आन्दोलन चर्किएको थियो।
