सुनसरीको झुम्का कारागारबाट आठ महिनाअघि भागेका ४२८ कैदीबन्दी अझै फरार छन्। भदौ २३ र २४ गते जेनजी आन्दोलनका क्रममा भागेका एक हजार ७९६ कैदीबन्दीमध्ये हालसम्म एक हजार ३६८ जना मात्र सम्पर्कमा आएका छन्।
जेलर सुभाष लामिछानेका अनुसार भागेकामध्ये करिब ५० जना भारतीय नागरिक रहेका छन्।
प्रहरीले गाउँले र चिनजानका व्यक्तिहरूको सहयोगमा कतिपयलाई पक्राउ गर्न सफल भएको छ। भारत गएका कैदीबन्दीलाई फर्काउन कठिनाई भए पनि नेपालभित्रकालाई क्रमशः पक्राउ गरिरहेको लामिछानेले बताए।
सुरुवाती चरणमा प्रहरीले भागेका कैदीबन्दीका आफन्तलाई फोन गरेर सम्पर्कमा आउन आग्रह गरेको थियो। करिब १२ सय जना फरार हुँदा सबैका आफन्तलाई फोन गरेपछि धेरै जना फर्किएर आएको प्रहरीले जनाएको छ।
प्रहरीले निरन्तर रूपमा फरार कैदीबन्दीको निगरानी गरिरहेको छ। गाउँबाट सूचना पर्याप्त आउने गरे पनि सहरी क्षेत्रबाट सूचना कम आउने गरेको छ।
तोकिएको समयभित्र सम्पर्कमा नआउने कैदीबन्दीलाई कारागार ऐन २०७९ र प्रचलित कानुनबमोजिम कारबाही गरिनेछ। हाल झुम्का कारागारको ‘ए’ र ‘बी’ ब्लकमा करिब एक हजार ६०० कैदीबन्दी रहेका छन्।
