भारतको पश्चिम बङ्गालमा भाजपाले सरकार बनाएपछि रोहिंगिया मुस्लिमहरू नेपाल छिर्न सक्ने आशङ्काले मोरङको जोगबनी नाकामा सुरक्षा कडाइ गरिएको छ। नेपाल प्रवेश गर्नेहरूका लागि परिचयपत्र अनिवार्य गरिएको छ।
मोरङ जिल्ला सुरक्षा समितिले अवैध घुसपैठ र आपराधिक गतिविधि नियन्त्रण गर्न यो निर्णय गरेको हो। सहायक प्रमुख जिल्ला अधिकारी सरोज कोइरालाले यसलाई नेपालको विशुद्ध आन्तरिक सुरक्षा सतर्कता भनेका छन्। उनले भने, ‘यो दुई पक्षीय वार्ताले होइन, नेपालको सीमामा कडाइ गर्नुपर्छ।’
सुरक्षा स्रोतका अनुसार, भारतको पश्चिम बङ्गालमा भारतीय जनता पार्टी (भाजपा) ले सरकार बनाएपछि रोहिंगिया मुस्लिमहरू नेपाल छिर्न सक्ने प्रशासनको आकलन छ। भारतीय सञ्चार माध्यममा भाजपा सरकार बनेपछि रोहिंगिया विस्थापित हुने प्रचार व्यापक बनेको छ।
एक सुरक्षा स्रोतले भारतीय मिडियामा पश्चिम बङ्गालमा भाजपा सरकार बनेपछि रोहिंगिया मुस्लिमहरूको भागाभाग भइरहेको बताएको छ। स्रोतका अनुसार, ‘मुस्लिमहरू टाउकोमा पोको बाँधेर भागिरहेका भिडियोहरू छ्यापछ्याप्ती छन्।’ प्रशासनले कलकत्ताबाट जोगबनी आउने रेलमार्फत रोहिंगियाहरू नेपाल छिर्ने जोखिम आकलन गरेको छ।
प्रशासनले रेल आउने समयमा विशेष निगरानी बढाउने रणनीति लिएको छ। सबै समय कडा चेकिङ गर्दा समस्या हुन्छ। त्यसैले, रेलको समयमा ५ सयदेखि १ हजार मानिस एकैचोटी छिर्दा विशेष तरिकाले परिचयपत्र हेर्ने व्यवस्था गरिएको छ।
सीमामा अवैध घुसपैठ रोक्न तालिमप्राप्त कुकुरको समेत प्रयोग गरिएको छ। रोहिंगियाबाहेक, भारततिर गएका करिब ५०० फरार कैदीहरूको आवतजावत रोक्नु पनि यो कडाइको अर्को उद्देश्य हो।
यो कदम परराष्ट्र मन्त्रालयको निर्देशनमा नभई जिल्ला तहको सुरक्षा समितिको आफ्नै निर्णय भएको स्रोतले जनाएको छ।
