जनआस्था साप्ताहिक र जनआस्था डटकममा मन्त्री तथा सत्तारुढ दलका नेतासम्बन्धी आलोचनात्मक समाचार प्रकाशित भएपछि वरिष्ठ पत्रकार किशोर श्रेष्ठमाथि प्रहरीले निगरानी र धरपकडको प्रयास गरेको छ। प्रेस काउन्सिल नेपालका पूर्वअध्यक्षसमेत रहेका श्रेष्ठले प्रधानमन्त्री बालेन शाहको निर्देशनमा आफूलाई धरपकड गर्ने, धम्क्याउने र स्रोत खुलाउन दबाब दिने गतिविधि बढेको जानकारी नेपाल पत्रकार महासङ्घलाई गराएका छन्।
समाचार लेखेकै आधारमा पत्रकारमाथि हुने यस्ता गतिविधि स्वतन्त्र प्रेस र लोकतन्त्रमाथिको प्रहार भएको महासङ्घका महासचिव रामप्रसाद दाहालले सोमबार जारी गरेको विज्ञप्तिमा उल्लेख छ। महासङ्घले प्रेस विरोधी गतिविधि तत्काल रोक्न आग्रह गरेको छ।
समाचारप्रति असहमति भए प्रेस काउन्सिल नेपालमार्फत समाधान खोज्न महासङ्घले सम्बन्धित पक्षलाई आग्रह गरेको छ। पत्रकार श्रेष्ठलाई धम्क्याउने व्यक्तिको पहिचान गरी तत्काल कानुनी कारबाही गर्न सरकारसँग माग गरिएको छ।
