मनोहरामा माग्नेको भेषमा आएका व्यक्तिले पाँच वर्षीया बालिकाको अपहरण प्रयास गरेका छन्। आज बिहान भएको घटनामा स्थानीयको सतर्कताले बालिका सकुशल छिन्।
जिल्ला प्रहरी परिसर काठमाडौंका अनुसार अन्दाजी ४०-४२ वर्षका ती व्यक्तिले पैसा माग्दै घरमा प्रवेश गरेका थिए। उनले बालिकालाई बिस्कुट किनिदिन्छु भन्दै फकाएर अपहरणको प्रयास गरेका थिए।
स्थानीयले तत्काल प्रहरीलाई खबर गरेपछि संलग्न व्यक्ति पक्राउ परेका छन्। जिल्ला प्रहरी परिसर काठमाडौंका एसपी पवन भट्टराईले आरोपीको नाम टीकराम महाराजजी रहेको बताए।
प्रहरीका अनुसार प्रारम्भिक सोधपुछमा उनले आफू ललितपुरको एक पाटीमा बस्ने गरेको बताएका छन्। घटनाबारे थप अनुसन्धान भइरहेको छ।
एसपी भट्टराईका अनुसार पक्राउ परेका व्यक्तिको मानसिक अवस्था सामान्य नदेखिएको छ। प्रहरीले घटनाबारे विस्तृत अनुसन्धान जारी राखेको छ।
