मनसुनअघि नै सरदरभन्दा बढी वर्षाले भण्डारण गरिएका अन्नबालीमा चिस्यानको समस्या निम्त्याएपछि कृषि विभागले किसानलाई उच्च सतर्कता अपनाउन आग्रह गरेको छ।
विभागले देशका अधिकांश भागमा सरदरभन्दा बढी वर्षाले भण्डारण गरिएका अन्न र दाल बालीमा चिस्यानको समस्या निम्त्याउने औँल्यायो। यसले उत्पादित वस्तुमा ठूलो क्षति पुर्याउन सक्ने चेतावनी दिएको छ।
किसानलाई भण्डारण गरिएका खाद्य वस्तुको नियमित अनुगमन गर्न र बालीलाई खेतमा नछाड्न विभागले सूचित गरेको छ।
आगामी साता मध्याह्नपछि हावाहुरी, चट्याङ र असिना पर्ने सम्भावना रहेकाले टिपेर बजार लैजानुपर्ने फलफूल एवं तरकारी बालीहरू बिहान शीत ओभाएपछि टिप्न विभागले सुझाव दिएको छ।
कृषि विभागका महानिर्देशक प्रकाशकुमार सञ्जेलले विभागले किसानलाई प्राविधिक सुझाव उपलब्ध गराएको बताए। यसमा उत्पादन वृद्धि, बाली संरक्षण र बजारीकरणसम्बन्धी सल्लाह पर्छन्। विभागले सम्भावित जोखिम न्यूनीकरणमा काम गरिरहेको उनको भनाइ छ।
कृषि तथा पशुपन्छी विकास मन्त्रालयअन्तर्गतको कृषि सूचना केन्द्रले मौसमअनुसार हावापानी, प्रकोप तथा प्राविधिक सल्लाह किसानलाई सूचनामार्फत उपलब्ध गराउँदै आएको छ।
केन्द्रका अधिकृत सन्जीव पण्डितले भण्डारणमा कीराबाट जोगाउन सुझाव दिए। भकारीको माथिल्लो भागमा चार–पाँच इन्च छहारीमा सुकाएको नीम, बकाइनो र तितेपातीका पात प्रयोग गर्न उनले भने।
केन्द्रले आलुको पुतली (जोताहा कीरा) ले भण्डारणमा असर गर्ने चेतावनी दियो। आलु खन्ने समयमा लामो समय खेतबारीमा थुपारेर राख्दा पुतलीले त्यसमा फुल पार्छ। यसले बालीमा नोक्सान पुर्याउँछ।
अतः, आलु खन्ने समयमा विशेष ध्यान पुर्याई सुरक्षित भण्डारण गर्न केन्द्रले किसानलाई सचेत गराएको छ।
