काठमाडौंको कुलेश्वरमा प्रहरीले स्रोत नखुलेको ७६ लाख रुपैयाँ नगदसहित एक जनालाई पक्राउ गरेको छ। काठमाडौं महानगरपालिका–१४ मा गरिएको कारबाहीमा यो रकम बरामद भएको हो।
पक्राउ पर्ने ३३ वर्षीय जितेन्द्र साह तुरहा पर्साको छिपहरमाई गाउँपालिका–१ का बासिन्दा हुन्। उनी कुलेश्वरस्थित आँचल फ्रुट सेन्टरका सञ्चालक हुन्।
उपत्यका अपराध अनुसन्धान कार्यालय र प्रहरी वृत्त कालिमाटीको टोलीले उनको फलफूल पसल र डेरामा खानतलासी गरेको थियो।
प्रहरीका अनुसार फलफूल पसलबाट १० लाख ७० हजार रुपैयाँ बरामद भयो। बाँकी रकम डेरामा फेला परेको हो। डेरामा लुकाएर राखेको ३ लाख ४ हजार भारतीय रुपैयाँसमेत बरामद भएको एसएसपी दिलीप घिमिरेले बताए।
प्रहरी वृत्त कालिमाटीले घटनाबारे थप अनुसन्धान गरिरहेको छ।
