लुम्बिनी प्रदेशका नवनियुक्त पाँच मन्त्रीले प्रदेश प्रमुख कृष्णबहादुर घर्तीमगरसमक्ष पद तथा गोपनीयताको शपथ लिएका छन्। बुटवलस्थित प्रदेश प्रमुखको कार्यालयमा आयोजित समारोहमा घर्तीमगरले उनीहरूलाई शपथ दिलाए।
नवनियुक्त मन्त्रीहरूमा कृषि, भूमि व्यवस्था तथा सहकारीमन्त्री तुलसीप्रसाद चौधरी, ऊर्जा, जलस्रोत तथा सिँचाइमन्त्री डिल्लीराज भुसाल, स्वास्थ्यमन्त्री रामजीप्रसाद घिमिरे, भौतिक पूर्वाधार विकासमन्त्री रत्नबहादुर खत्री र आन्तरिक मामिला तथा कानुनमन्त्री भण्डारीलाल अहिर छन्।
मुख्यमन्त्री चेतनारायण आचार्यको सिफारिसमा संविधानबमोजिम मन्त्रिपरिषद् पुनर्गठन भएको हो। पुनर्गठित मन्त्रिपरिषद्मा एमालेबाट चार र जनता समाजवादी पार्टीबाट एक जना नयाँ मन्त्री सहभागी छन्।
शपथ ग्रहण समारोहमा मुख्यमन्त्री आचार्य, पूर्वमुख्यमन्त्री जोखबहादुर महरा, सभामुख तुलाराम घर्तीमगर, उपसभामुख मेनुका खाँड केसी सहभागी थिए।
