लुम्बिनी प्रदेश सरकारका चार मन्त्रीले सामुहिक राजीनामा दिएका छन्। मुख्यमन्त्री चेतनारायण आचार्यको निर्देशनमा भौतिक पूर्वाधार विकास मन्त्री भूमिश्वर ढकाल, कृषि मन्त्री दिनेश पन्थी, स्वास्थ्य मन्त्री खेम सारु मगर र ऊर्जा मन्त्री सीता शर्मा चौधरीले राजीनामा बुझाएका हुन्।
एमालेले पुराना मन्त्रीलाई फिर्ता बोलाएर नयाँलाई अवसर दिने रणनीति अपनाएको छ। गुल्मीका डिल्लीराज भुसाल, अर्घाखाँचीका रामजी घिमिरे, रूपन्देहीका तुलसीप्रसाद चौधरी र बाँकेका रत्न खत्रीको नाम सिफारिस भएको छ। रत्न खत्रीबाहेक अन्य तीन जना मन्त्रीका लागि नयाँ अनुहार हुन्।
पार्टी अध्यक्ष केपी शर्मा ओलीको निर्देशनपछि मुख्यमन्त्री आचार्यले मन्त्रीहरूलाई राजीनामा दिन आग्रह गरेका हुन्। दोस्रोपटक निर्वाचित भई मन्त्री बन्ने अवसर नपाएका सांसदलाई प्राथमिकता दिने आधारमा रामजी घिमिरे र तुलसीप्रसाद चौधरी सिफारिसमा परेका हुन्। प्रदेशसभाका ज्येष्ठ सदस्य डिल्लीराज भुसाललाई पनि मन्त्रीका लागि अघि सारिएको छ।
यसअघि जेठको पहिलो सातामा मन्त्री हेरफेरको प्रयास भएको थियो। नेपाली कांग्रेसले मुख्यमन्त्रीसहित एकैपटक सरकार पुनर्गठन गर्नुपर्ने अडान राखेपछि त्यो रोकिएको थियो। कांग्रेसले सरकारको नेतृत्व परिवर्तनको दबाब दिइरहेको छ। मुख्यमन्त्री आचार्यले बजेटपछि मात्र नेतृत्व छाड्ने अडान लिएका छन्।
प्रदेश सरकारले आगामी साउन १ गतेदेखि मन्त्रालयको संख्या घटाएर ८ कायम गर्ने निर्णय गरेको छ। यो निर्णय सरकारको नीति तथा कार्यक्रममा समेत समेटिएको छ।
