त्रिभुवन विश्वविद्यालयको एमबिएस प्रथम सेमेस्टरको ‘अर्गनाइजेशनल बिहेवियर’ विषयको प्रश्नपत्र परीक्षा हुनुअघि नै सार्वजनिक गर्ने एक व्यक्ति पक्राउ परेका छन्। साउन ८ गते परीक्षा सुरु भएलगत्तै प्रश्नपत्र ह्वाट्सएप समूहमा सेयर गरी गोपनीयता भंग गरेको आरोपमा कैलाली घर भई हाल भक्तपुर बस्ने ३३ वर्षीय सन्दीप सिंहलाई केन्द्रीय अनुसन्धान ब्युरो (सिआइबी) ले भक्तपुरको मध्यपुरथिमी–१ बाट पक्राउ गरेको हो।
सिआइबीका प्रवक्ता प्रहरी वरिष्ठ उपरीक्षक अनुपम शम्शेर जबराका अनुसार सिंहमाथि थप अनुसन्धान भइरहेको छ। प्रहरीले यसअघि अनुसन्धानका क्रममा अन्य केही व्यक्तिलाई समेत नियन्त्रणमा लिएको थियो।
एमबिएस प्रथम सेमेस्टरका अन्य विषयका परीक्षा बाँकी रहेकै अवस्थामा सिआइबीले गैरकानुनी क्रियाकलाप नगर्न विद्यार्थी तथा सम्बन्धित पक्षलाई सचेत गराएको छ।
