मनसुनी वायुले देशभर प्रभाव पारेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानमै छ।
कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भू-भागमा बादल लागेको छ। लुम्बिनी र सुदूरपश्चिमका तराई क्षेत्रमा आंशिक बदली छ।
कोशी र बागमती प्रदेशका केही ठाउँमा मध्यम वर्षा भइरहेको छ। गण्डकी र कर्णालीका थोरै स्थानमा वर्षा छ। लुम्बिनी र सुदूरपश्चिम प्रदेशका एक-दुई स्थानमा हल्का वर्षा भइरहेको छ।
बिहीबार दिनभर कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी क्षेत्रमा बादल लाग्नेछ। मधेस प्रदेश र सुदूरपश्चिमको तराई भू-भागमा आंशिक बादल लाग्नेछ।
महाशाखाका अनुसार दिउँसो र राति कोशी, बागमती, गण्डकी र लुम्बिनी प्रदेशका हिमाली तथा पहाडी भू-भागका केही स्थानमा मध्यम वर्षा हुनेछ। कर्णाली र सुदूरपश्चिम प्रदेशका हिमाली तथा पहाडी भेगका थोरै स्थानमा मध्यमसम्मको वर्षा र हिमपातको समेत सम्भावना छ।
मधेस प्रदेशसहित कोशी, बागमती, गण्डकी र लुम्बिनीका तराई भू-भागका थोरै स्थानमा तथा सुदूरपश्चिमको तराईका एक-दुई स्थानमा मध्यमसम्मको वर्षा हुन सक्ने महाशाखाले जनाएको छ।
