पाँच वर्षभित्र नेपालमा लागुऔषध प्रयोग शून्यमा झार्न राष्ट्रिय स्वतन्त्र पार्टीकी सांसद निशा डाँगीले सरकारलाई चुनौती दिएकी छन्।
मंगलबार प्रतिनिधि सभाको शून्य समयमा डाँगीले बोलिन्। निर्वाचन क्षेत्रमा अभिभावकहरूले सन्तानको रक्षाका लागि आग्रह गरेको उनले सुनाइन्।
झापा निर्वाचन क्षेत्र नम्बर १ मात्र होइन, सीमा नाकाहरूमा लागुऔषधको समस्या व्यापक छ। लागुऔषध प्रयोग र ओसारपसार राष्ट्रिय समस्या बनेको उनले बताइन्।
लागुऔषध ब्युरोका अनुसार नेपालमा १ लाख ५० हजारभन्दा बढी प्रयोगकर्ता छन्। सीमा क्षेत्रमा यो समस्या झन् विकराल रहेको भन्दै उनले सरकारको ध्यानाकर्षण गराइन्।
डाँगीले ‘से नो टु ड्रग्स’ जस्ता राष्ट्रव्यापी अभियान चलाउन माग गरिन्। पाँच वर्षभित्र लागुऔषध प्रयोग शून्यमा झार्न सरकारलाई आह्वान गरिन्।
