म्याग्दीको महभिरमा पहिरो खसेपछि बेनी–जोमसोम सडक आज बिहानदेखि अवरुद्ध भएको छ।
ढुङ्गा र माटोसहितको पहिरो खसेको छ। ७६ किलोमिटर बेनी-जोमसोम सडकमा यातायात सम्पर्कविच्छेद भयो। बेनीदेखि मुस्ताङ र जोमसोमदेखि बेनीतर्फका सवारीसाधन बीचबाटोमै रोकिएका छन्।
सडक अवरुद्ध हुँदा स्थानीयवासी, पर्यटक र तीर्थयात्री प्रभावित भएका छन्।
जिल्ला प्रहरीका सूचना अधिकारी सागर तिमिल्सीनाले सडक विभागका उपकरण परिचालन गरी सडक खुलाउने पहल भइरहेको बताए।
महभिरमा सडकदेखि करिब ५०० मिटरमाथिको भिरबाट नियमित पहिरो खस्छ। सामान्य वर्षा हुँदा लेदोसहित पहिरो खस्छ। यसले सडक अवरुद्ध गराउँछ र दुर्घटनाको जोखिम बढाउँछ।
