चालु आर्थिक वर्षमा नेपालको अर्थतन्त्र तीन दशमलव ८५ प्रतिशतले विस्तार हुने अनुमान छ। अर्थतन्त्रको आकार रु ६६ खर्ब पुग्नेछ। प्रतिव्यक्ति कुल राष्ट्रिय आय एक हजार ५३५ अमेरिकी डलर पुग्नेछ।
विप्रेषण आप्रवाह ३७ दशमलव सात प्रतिशतले वृद्धि भई रु १४ खर्ब ५० अर्ब पुगेको छ। यसले बाह्य क्षेत्रलाई बलियो बनाएको छ। शोधनान्तर स्थिति रु छ खर्ब ५८ अर्ब बचतमा छ। चालु खाता रु पाँच खर्ब ५३ अर्ब बचतमा छ। विदेशी विनिमय सञ्चिति रु ३४ खर्ब १४ अर्ब पुगेको छ। यसले १८ दशमलव पाँच महिनाको वस्तु तथा सेवा आयात धान्न सक्ने क्षमता देखाउँछ।
चालु आर्थिक वर्षको फागुनसम्म औसत उपभोक्ता मुद्रास्फीति दुई दशमलव १३ प्रतिशत कायम छ। यो नियन्त्रणमा रहेको मानिन्छ।
सङ्घीय राजस्व तीन दशमलव दुई प्रतिशतले बढेको छ। तर, पुँजीगत खर्चमा अपेक्षित सुधार हुन सकेको छैन। चालू आवको फागुन मसान्तसम्म सरकारले आन्तरिक तथा बाह्य ऋणमार्फत करिब रु तीन खर्ब सार्वजनिक ऋण परिचालन गरेको छ। यस अवधिमा वित्त सन्तुलन रु ५९ अर्ब र प्राथमिक सन्तुलन रु नौ अर्ब घाटामा छ।
गत फागुनसम्ममा सार्वजनिक ऋण बढेर रु २८ खर्ब ७८ अर्ब पुगेको छ। यो कुल गार्हस्थ उत्पादनको ४३ दशमलव छ प्रतिशत हो।
व्यापार घाटा ११ दशमलव दुई प्रतिशतले बढेर रु १० खर्ब ९८ अर्ब पुगेको छ।
बैंकिङ क्षेत्रमा पर्याप्त तरलता छ। तर, निजी क्षेत्रतर्फ कर्जा विस्तार केबल छ दशमलव सात प्रतिशतमा सीमित छ। यसले निजी लगानी र आर्थिक गतिविधि सुस्त रहेको सङ्केत गर्दछ।
