गत वैशाख महिनाभरि देशभरबाट विभिन्न मुद्दामा फरार रहेका २ हजार ३१९ जना प्रतिवादीलाई नेपाल प्रहरीले पक्राउ गरेको छ। केन्द्रीय अनुसन्धान ब्यूरो (सीआईबी) ले १२ जनालाई नियन्त्रणमा लिएको छ भने काठमाडौं उपत्यका प्रहरी कार्यालयले ३६६ जनालाई पक्राउ गरेको छ।
प्रदेशगत तथ्यांकअनुसार, कोशी प्रदेशबाट ३२६ जना, मधेश प्रदेशबाट ७३० जना, बागमती प्रदेशबाट १९९ जना, गण्डकी प्रदेशबाट २०४ जना, लुम्बिनी प्रदेशबाट ३३० जना, कर्णाली प्रदेशबाट ६८ जना र सुदूरपश्चिम प्रदेशबाट ८४ जना फरार प्रतिवादी पक्राउ परेका छन्।
यसरी पक्राउ परेका प्रतिवादीहरूबाट तोकिएको कुल ८ सय २५ वर्ष २ महिना २५ दिन कैद सजाय कार्यान्वयन गराइएको छ। साथै, उनीहरूबाट २१ करोड ५३ लाख ६९ हजार १ सय १० रूपैयाँ जरिवाना रकम पनि असुल उपर गरिएको छ।
यसैबीच, चितवन प्रहरीले सात वर्षअघि फरार रहेका एक प्रतिवादीलाई बाराबाट पक्राउ गरेको छ। पक्राउ पर्नेमा बाराको फेटा गाउँपालिकाका ३० वर्षीय पन्चदेव महरा छन्। उनी २०७६ चैत २३ गते खैरहनी नगरपालिकामा भएको एक हत्या घटनामा संलग्न रहेको आरोपमा पक्राउ परेका हुन्। जिल्ला अदालतबाट म्याद थप गरी प्रहरीले थप अनुसन्धान गरिरहेको छ।
