गण्डकी, बागमती र कोशी प्रदेशमा अहिले वर्षा भइरहेको छ। मधेश र कोशीको तराईमा हुरीको सम्भावना छ।
मौसम पूर्वानुमान महाशाखाका अनुसार देशमा पश्चिमी तथा स्थानीय वायुको प्रभाव छ। आइतबार दिउँसो कोशी प्रदेशसहित बागमती, गण्डकी र कर्णाली प्रदेशका हिमाली तथा पहाडी भूभागमा सामान्यदेखि पूर्ण बदली रहनेछ। बाँकी भूभागमा आंशिक बदली रहनेछ।
कोशी प्रदेशको हिमाली तथा पहाडी भूभागका केही स्थानमा, बागमती, गण्डकी र कर्णाली प्रदेशका हिमाली तथा पहाडी भूभागका थोरै स्थानमा मेघगर्जन तथा चट्याङसहित मध्यम वर्षाको सम्भावना छ। यस्तै, मधेश, लुम्बिनी र सुदूरपश्चिम प्रदेशका हिमाली तथा पहाडी भूभाग र कोशी प्रदेशको तराई क्षेत्रका एक-दुई स्थानमा मेघगर्जन तथा चट्याङसहित वर्षा हुनेछ। यी क्षेत्रमा हिमपातको सम्भावना पनि रहेको महाशाखाले उल्लेख गरेको छ।
मधेश प्रदेश र कोशी प्रदेशका तराई क्षेत्रका केही स्थानमा हुरी चल्ने सम्भावना छ। सतर्कता अपनाउन महाशाखाले आग्रह गरेको छ। सुदूरपश्चिम र लुम्बिनी प्रदेशका केही भूभागमा तापक्रम बढ्न सक्ने सम्भावना पनि महाशाखाले औंल्याएको छ।
आज राति कोशी, बागमती र गण्डकी प्रदेशका हिमाली तथा पहाडी भूभागमा सामान्य बदली रहनेछ। कर्णाली प्रदेशको हिमाली भूभाग र मधेश प्रदेशमा आंशिक बदली रहनेछ भने बाँकी पहाडी तथा तराई भूभागमा मौसम मुख्यतया सफा रहनेछ।
राति कोशी प्रदेशका केही स्थान तथा बागमती र गण्डकी प्रदेशका हिमाली तथा पहाडी भूभागका एक-दुई स्थानमा मेघगर्जन तथा चट्याङसहित हल्का वर्षा र हिमपातको सम्भावना छ। तराई क्षेत्रका केही स्थानमा हुरी चल्न सक्ने भएकाले सावधानी अपनाउन महाशाखाले अनुरोध गरेको छ।
