दक्षिण पूर्वी एसियाका अनलाइन स्क्यामिङ सेन्टरमा ठगीमा परेका थप ७१ जना नेपालीको उद्धार गरिएको छ। परराष्ट्र मन्त्रालयका प्रवक्ता लोकबहादुर पौडेलले शुक्रबार आयोजित पत्रकार सम्मेलनमा सो जानकारी दिए।
हालसम्म कम्बोडियाबाट ५ सय ६२, म्यानमारबाट १ सय ११, लाओसबाट ८ र थाइल्याण्डबाट ६ जनाको उद्धार गरी नेपाल फर्काइएको छ। यसअघि ६ सय १६ जनाको उद्धार गरिएको थियो।
नेपाली दूतावास बैंककको अनुरोधमा कम्बोडिया सरकारले १ सय २ जना नेपालीको जरिवाना मिनाहा गरेको छ। थप १७२ जनाको जरिवाना मिनाहाका लागि अनुरोध गरिएको छ।
कम्बोडियामा मानव तस्करी, यातना र संगठित अपराधको आरोपमा २९ जना नेपाली थुनामा छन्। उनीहरूको रिहाइ र उद्धारका लागि दूतावासले पहल गरिरहेको छ।
प्रवक्ता पौडेलले पश्चिम एसियामा रहेका नेपालीहरूको अवस्था सामान्य रहेको र उनीहरूको सुरक्षा सरकारको प्राथमिकतामा रहेको बताए। इरानको बन्दर अब्बासमा थुनामा रहेका अमृत झाको निष्पक्ष सुनुवाइका लागि कूटनीतिक पहल जारी छ।
नेपालबाट भारततर्फ चिया निकासी प्रभावित भएको समस्या भारतीय टी बोर्डले निर्देशिका संशोधन गरेपछि समाधान हुने भएको छ।
