युक्रेनले उत्तर कोरियाले रुसलाई युक्रेनविरुद्धको युद्धमा सहयोग गर्न थप हजारौं सैनिक पठाउने तयारी गरिरहेको दाबी गरेको छ। युक्रेनी राष्ट्रपति भोलोदिमिर जेलेन्स्कीका अनुसार उत्तर कोरियाले ५० हजारसम्म सैनिक तैनाथ गर्ने गरी ठूलो सैन्य टोली पठाउन लागेको हो।
उत्तर कोरियाले आधुनिक युद्धको अनुभव हासिल गरिरहेको छ। सन् २०२४ को ग्रीष्म ऋतुमा रुस र उत्तर कोरियाबीच भएको रक्षा सम्झौता पश्चात् प्योङयाङले रुसलाई सैनिक पठाउन थालेको थियो।
विश्लेषकहरूका अनुसार यसअघि करिब १४ हजारदेखि १५ हजार सैनिक कुस्र्क क्षेत्रमा तैनाथ गरिएका थिए। प्योङयाङले थप ६ हजार सुरुङ खन्ने र विस्फोटक पदार्थसम्बन्धी काममा विशेषज्ञ सैनिक र सैन्य निर्माण कार्यकर्ता पठाउन सहमति जनाएको थियो।
दक्षिण कोरियाली र युक्रेनी अधिकारीहरूले उत्तर कोरियाले रुसलाई लाखौं तोपका गोला र ब्यालिस्टिक मिसाइल पनि उपलब्ध गराएको बताएका छन्। दक्षिण कोरियाली गुप्तचर निकायको अनुमानअनुसार अहिलेसम्म करिब ६ हजार उत्तर कोरियाली सैनिक मारिएका वा घाइते भएका छन्।
जापानको क्योदो न्युजले युक्रेनी सैन्य गुप्तचर संस्थालाई उद्धृत गर्दै उत्तर कोरियाली सैनिकको संख्या बढ्ने खबर पुष्टि गरेको छ। युक्रेनी स्रोतका अनुसार नोभेम्बरको अन्त्यसम्ममा ५० हजारसम्म उत्तर कोरियाली सैनिक रुसमा तैनाथ हुन सक्छन्। यी सैनिकहरूले रुसका कुस्र्क, ब्रायन्स्क र बेलगोरोड क्षेत्रमा सुरक्षाको जिम्मेवारी सम्हाल्नेछन्। यसले रुसी फौजलाई युक्रेनी अग्रपङ्क्तिमा खटिन सहज बनाउनेछ।
