इस्लामाबादको पिम्स अस्पतालको नर्सरीमा आगलागी हुँदा १४ नवजात शिशुको मृत्यु भएको छ।
स्थानीय समयअनुसार बिहान ६:३८ बजे एयर कन्डिसनरमा स्पार्क भएपछि आगलागी सुरु भएको थियो। इन्क्युबेटरमा प्रयोग भइरहेको अक्सिजनले आगो तीव्र रूपमा फैलायो। १५ शिशुमध्ये एक जनाको उद्धार गरिएको Nmkhabarलाई स्रोतले पुष्टि गर्यो।
उद्धारकर्मीले भाँचिएका झ्यालबाट नर्सरीमा प्रवेश गरी शिशुहरूलाई बाहिर निकाल्ने प्रयास गरे। नर्सरीमा रहेका चिकित्सक र नर्सले पनि तत्काल उद्धार थालेका थिए। आगोले छतको केही भाग खसालेको थियो।
केही अभिभावकले उद्धारमा ढिलाइ भएको भन्दै प्रश्न उठाएका छन्। उनीहरूले अग्नि सुरक्षा व्यवस्थाबारे छानबिनको माग गरेका छन्। अस्पतालले ३५ वटा आगो निभाउने उपकरण रहेको दाबी गरेको छ।
आगो नर्सरीमै सीमित रह्यो। अस्पतालका अन्य भागमा ठूलो क्षति भएन। उद्धार टोलीले सोही तलाको अर्को वार्डका ७३ जना बिरामीलाई सुरक्षित स्थानमा सार्यो।
इस्लामाबाद जिल्ला प्रशासनले घटनाको छानबिन गर्न समिति गठन गरेको छ। समितिले २४ घण्टाभित्र प्रतिवेदन बुझाउनुपर्नेछ।
प्रधानमन्त्री शहबाज शरीफले स्वास्थ्य सचिव असलम घौरीलाई पदबाट हटाउन आदेश दिए। स्वास्थ्य मन्त्री मुस्तफा कमलले लापरवाही गर्नेलाई कारबाही गर्ने बताए।
प्रधानमन्त्री शरीफ र राष्ट्रपति आसिफ अली जरदारीले घटनाप्रति दुःख व्यक्त गरे। जरदारीले अस्पतालहरूमा प्रभावकारी अग्नि सुरक्षा सुनिश्चित गर्न आग्रह गरे।
