पाकिस्तानको बलुचिस्तान प्रान्तको क्वेटामा आइतबार जाफर एक्सप्रेस रेलमा आत्मघाती बम विस्फोट भएको छ। यस विस्फोटमा कम्तिमा २३ जनाको मृत्यु भएको छ भने ५३ जनाभन्दा बढी घाइते भएको पाकिस्तानी सञ्चारमाध्यमले जनाएका छन्।
क्वेटा क्यान्टतर्फ गइरहेको रेललाई लक्षित गरी शक्तिशाली विस्फोट भएको प्रहरीले जनाएको छ। बलुचिस्तान सरकारका गृह मामिलासम्बन्धी विशेष सहायक बाबर युसुफजाईले घटनाको अनुसन्धान भइरहेको र सबै सुरक्षा निकायहरू उच्च सतर्कतामा रहेको बताए। उनले मानिसहरूलाई घटनास्थल वरिपरि भेला नहुन अपील गरे।
हालसम्म कुनै पनि संगठनले यस आक्रमणको जिम्मेवारी लिएको छैन। सुरक्षा निकायहरूले यसलाई आतंकवादी हमलाको रूपमा अनुसन्धान गरिरहेका छन्।
