प्रधानमन्त्री बालेन्द्र शाहको अनुपस्थितिमा अर्थमन्त्री डा. स्वर्णिम वाग्लेले नीति तथा कार्यक्रममाथि उठेका प्रश्नको जवाफ दिन थालेपछि बिहीबार तीन विपक्षी दलले प्रतिनिधिसभा बैठक बहिष्कार गरेका छन्।
राष्ट्रिय प्रजातन्त्र पार्टी (राप्रपा), नेकपा र श्रम संस्कृति पार्टीका सांसदहरू बैठक छाडेर बाहिरिएका हुन्। प्रधानमन्त्री स्वयं संसदमा उपस्थित भएर सांसदका प्रश्नको जवाफ दिनुपर्ने माग विपक्षी दलले राख्दै आएका थिए।
प्रधानमन्त्री शाह बिहीबारको बैठकमा अनुपस्थित रहे। सभामुख डोलप्रसाद अर्यालले प्रधानमन्त्रीका तर्फबाट जवाफ दिन अर्थमन्त्री वाग्लेलाई समय दिए। यसपछि तीन दलले बैठक बहिष्कार गर्ने निर्णय लिए।
यसै क्रममा नेपाली कांग्रेस र नेकपा एमालेका सांसदहरूले पनि उभिएर विरोध जनाए। प्रधानमन्त्रीको अनुपस्थितिलाई लिएर संसदमा नाराबाजीसमेत भएको थियो।
विपक्षी दलहरूको विरोध र नाराबाजीका बाबजुद पनि संसद बैठक भने अघि बढेको थियो।
