भोजपुरका बेँसी क्षेत्रमा फौजी किराले मकैबाली सखाप पारेको छ। पौवादुङमा–६ ठूलोदुम्माका किसान बलराम राईका अनुसार कीराले पात, डाठ र गाभा खाइदिँदा बाली नष्ट हुने अवस्थामा छ।
राईले भने, ‘पानी नपरेर मकै राम्रोसँग बढ्न सकेन। त्यसमाथि फौजी कीराले झन् नोक्सान गर्यो।’ खडेरीले बाली कमजोर भएको मौकामा कीराको प्रकोप बढेको उनको भनाइ छ।
किसानहरूले समयमै नियन्त्रणका उपाय नअपनाइए ठूलो क्षति हुने भन्दै तत्काल सहयोगको माग गरेका छन्। पौवादुङमा गाउँपालिकाका कृषि शाखाका प्राविधिक वर्तेन्द्र राईले प्रभावित क्षेत्रमा प्राविधिक टोली खटाएर अनुगमन र परामर्श दिइरहेको बताए।
