नेपालमा यस वर्षको प्रि-मनसुन सिजनमा विगत ४५ वर्षयताकै सर्वाधिक वर्षा भएको छ। जल तथा मौसम विज्ञान विभागका अनुसार यस वर्षको वर्षाले विगतका सबै कीर्तिमान भंग गरेको हो।
प्रि-मनसुन सिजनमा औसत २२६.३ मिलिमिटर पानी पर्ने गर्छ। यस वर्ष ३३९.७७ मिलिमिटर वर्षा भएको छ। यो औसतको १४५.५ प्रतिशत हो।
जल तथा मौसम विज्ञान विभागले सन् १९८१ देखि १२६ वर्षा मापन केन्द्रको तथ्यांक विश्लेषण गर्दै आएको छ। यसअघि सन् १९९० मा ३३१.४० मिलिमिटर वर्षा भएको थियो। यस वर्षको वर्षाले ३६ वर्ष पुरानो उक्त रेकर्डलाई उछिनेको छ।
प्रि–मनसुन मध्य फागुनदेखि मध्य जेठसम्मको अवधि हो। यो प्रायः सुक्खा हुन्छ। तर यस वर्ष वैशाखसम्मै पानी, असिना र हिउँ परेको छ। सक्रिय पश्चिमी वायु, स्थानीय वायु र बंगालको खाडीबाट आएको जलवाष्पयुक्त वायुले वर्षा गराएको हो।
जलवायु परिवर्तन र वायुमण्डलीय प्रभावले प्रि-मनसुन समयमै सक्रिय भई औसतभन्दा बढी वर्षा भएको हो। प्रि-मनसुनको यो अत्यधिक वर्षाले आगामी मुख्य मनसुनको असरबारे सजग रहनुपर्ने संकेत गरेको छ।
यस वर्षको मुख्य मनसुनमा देशभर सरदरभन्दा कम वर्षा र बढी गर्मी हुने पूर्वानुमान छ। विज्ञहरूका अनुसार छोटो अवधिमा हुने अत्यधिक वर्षा, बढ्दो तापक्रम र पानीको अभावले यो वर्षको मनसुन खतरनाक बन्न सक्नेछ।
नेपालमा मनसुन आगमनको सामान्य मिति जुन १३ हो। यस वर्ष मनसुन आगमनमा ढिलाइ भएको छ।
