प्रधानमन्त्री बालेन्द्र शाह र संयुक्त राष्ट्रसंघका महासचिव एन्टोनियो गुटेरेसबीच न्यूयोर्कस्थित राष्ट्रसंघ मुख्यालयमा भेटवार्ता भएको छ। संयुक्त राष्ट्रसंघको ८१औं महासभामा सहभागी हुन अमेरिका पुगेका प्रधानमन्त्री शाहले महासचिव गुटेरेससँग द्विपक्षीय हितका विषयमा छलफल गरेका हुन्।
भेटवार्ताका क्रममा महासचिव गुटेरेसले भोटेकोशीमा आएको विपद्बाट भएको जनधनको क्षतिप्रति गहिरो समवेदना व्यक्त गरेका छन्। उनले जलवायु परिवर्तनका मुद्दामा संयुक्त राष्ट्रसंघ नेपालसँग ऐक्यबद्ध रहेको पनि बताए। महासचिव गुटेरेसले सन् १९७८ मा पर्यटकका रूपमा नेपाल आएको स्मरण गर्दै पदबाट निवृत्त भएपछि पनि नेपाललाई सहयोग गर्ने प्रतिबद्धता व्यक्त गरे।
प्रधानमन्त्री शाहले नेपालप्रतिको सद्भावका लागि महासचिव गुटेरेसलाई धन्यवाद दिँदै उनको सफल कार्यकालका लागि बधाई ज्ञापन गरे। उनले भोटेकोशी विपद्बाट नेपालले ठूलो क्षति बेहोरेको र हिमताल फुट्ने जोखिम अझै उच्च रहेको जानकारी गराए।
भेटमा नदी किनारका बासिन्दाको पुनर्वास र हरित पुनर्निर्माणका विषयमा पनि छलफल भएको थियो। यस्तै, अतिकम विकसित राष्ट्र (एलडीसी) सूचीबाट नेपालको स्तरोन्नतिको समयसीमा थपका लागि समर्थन जुटाउने विषयमा पनि कुराकानी भएको थियो।
प्रधानमन्त्री शाहले आजै महासभालाई सम्बोधन गर्ने कार्यक्रम छ। रसुवा भोटेकोशी बाढीपछि नेपालले बेहोरेको क्षति जलवायु परिवर्तनसँग जोडिएको निष्कर्षसहित संयुक्त राष्ट्रसंघमा प्रभावकारी रुपमा विषय उठाउन प्रधानमन्त्रीको सहभागिता आवश्यक ठानेर उनी न्युयोर्क आइपुगेका हुन्। परराष्ट्रमन्त्री शिशिर खनालले पनि यस क्रममा विभिन्न द्विपक्षीय भेटघाटलाई तीव्रता दिइरहेका छन्।
