प्रस्तावित निर्वाचन आयुक्तविरुद्ध उजुरी आह्वान

संसदीय सुनुवाइ समितिले निर्वाचन आयोगका प्रमुख निर्वाचन आयुक्त र आयुक्तमा सिफारिस भएका तीन जनाविरुद्ध उजुरी आह्वान गरेको छ। समितिले सार्वजनिक सूचना जारी गर्दै संवैधानिक परिषद्बाट सिफारिस गरिएका व्यक्तिहरूको नियुक्ति उपयुक्त नभएमा ठोस आधार, प्रमाण वा सूचना १० दिनभित्र पेश गर्न आग्रह गरेको छ। प्रमुख निर्वाचन आयुक्तमा सिफारिस भएका मानबहादुर कार्की (मोरङ) तथा निर्वाचन आयुक्तहरूमा सिफारिस भएका डा राजीव सुब्बा (काठमाडौँ) र गुरुप्रसाद वाग्ले (ओखलढुङ्गा) विरुद्ध प्रमाणसहित नेपाली वा अङ्ग्रेजीमा उजुरी दिन सकिनेछ। उजुरीमा उजुरीकर्ताको नाम, थर, ठेगाना, फोन नम्बर र जिल्ला स्पष्ट खुल्नुपर्नेछ। आधार र प्रमाणका कागजातको प्रतिलिपि पनि संलग्न गर्नुपर्नेछ। उजुरी सिंहदरबारस्थित संसदीय सुनुवाइ समितिको सचिवालयमा वा जिल्ला प्रशासन कार्यालयमार्फत दस्तुरबिना बुझाउन सकिनेछ। समितिले यो सूचना पहिलो पटक असार २६ गते प्रकाशित गरेको थियो। प्रधानमन्त्रीको अध्यक्षतामा असार १९ गते बसेको संवैधानिक परिषद्को बैठकले यी व्यक्तिहरूलाई नियुक्तिका लागि सिफारिस गर्ने निर्णय गरेको थियो।