राष्ट्रिय स्वतन्त्र पार्टी (रास्वपा) ले मोरङ, ताप्लेजुङ र झापा जिल्लामा नयाँ जिल्ला नेतृत्व चयन गरेको छ। पार्टीको सांगठनिक विस्तारलाई तीव्र पार्ने क्रममा विभिन्न जिल्लामा सम्पन्न भएका अधिवेशनहरूबाट नयाँ कार्यसमितिहरू निर्वाचित भएका हुन्।
मोरङ जिल्लामा भरतराज कँडेल सभापतिमा निर्वाचित भएका छन्। पहिलो जिल्ला अधिवेशनबाट कँडेलको नेतृत्वमा नयाँ कार्यसमिति चयन भएको हो। उपसभापतिमा विमला बस्नेत निर्विरोध चयन भइन् भने दिवस नेपाल सचिवमा विजयी भए। सिर्जना गिरी सह–सचिवमा निर्वाचित भइन्। रास्वपा मोरङको विधानअनुसार पदाधिकारीसहित ९ जना चुनिने र २ जना सदस्य मनोनित गरिने व्यवस्था छ। जिल्ला समितिमा पालिका सभापतिहरू स्वतः पदेन सदस्य हुनेछन्। अधिवेशनमा ४८५ मत खसेको थियो।
यसैगरी, ताप्लेजुङमा राजनकुमार गुरुङ राष्ट्रिय स्वतन्त्र पार्टीको सभापति चयन भएका छन्। प्रथम जिल्ला अधिवेशनबाट उनी सर्वसम्मतिमा सभापति चुनिएका हुन्। उपसभापतिमा मानबहादुर तामाङ, सचिवमा लीलाप्रसाद पौडेल र सहसचिवमा गोपाल गुरागाईं निर्वाचित भएका छन्। अधिवेशनले सात जना सदस्य पनि सर्वसम्मतिमा चयन गरेको छ। नवनिर्वाचित नेतृत्वले जिल्लामा संगठन विस्तार, सुदृढीकरण तथा सुशासनका एजेण्डालाई प्रभावकारी रूपमा अघि बढाउने प्रतिबद्धता व्यक्त गरेका छन्। प्रतिनिधिसभा सदस्य मिङ्मा शेर्पाले अधिवेशनको उद्घाटन गरेका थिए।
झापा जिल्लामा ओमनाथ भण्डारीलाई सभापति चयन गरिएको छ। रास्वपाले झापा जिल्लाका लागि नयाँ कार्यसमिति चयन गरेको हो, जसमा उपसभापतिमा पुष्पा ढकाल, सचिवमा विरोध सुबेदी र सहसचिवमा भीम कुँवर चयन भएका छन्। डिल्लीराम न्यौपाने, राजनारायण राजवंशी र शान्तिमाया न्यौपाने सदस्यको जिम्मेवारीमा छन्। क्षेत्रीय समन्वयकहरूमा कमल गौतम (क्षेत्र नं. १), गोपाल कटुवाल (क्षेत्र नं. २), कमल बानियाँ (क्षेत्र नं. ३), लिलामाया बस्नेत (क्षेत्र नं. ४) र चूडामणि पाठक (क्षेत्र नं. ५) नियुक्त भएका छन्।
