गृहमन्त्री सुधन गुरुङले आठ वर्षदेखि निर्माणाधीन रसुवागढी एकीकृत भन्सार भवनको निर्माण कार्य तत्काल सम्पन्न गर्न निर्देशन दिएका छन्। निरीक्षणका क्रममा उनले कामदारको संख्या बढाएर निर्माण गति तीव्र पार्न आग्रह गरे।
ठेक्का लिएर काममा ढिलासुस्ती गर्ने ठेकेदार कम्पनी र प्राविधिक वा अनुगमनकर्तालाई कारबाहीको चेतावनी दिइएको छ। आठ वर्ष बितिसक्दा पनि निर्माणमा भएको ढिलाइप्रति गृहमन्त्रीको निर्देशनले स्थानीयवासी आशावादी बनेका छन्।
रसुवागढी क्षेत्रको निरीक्षणपछि गृहमन्त्री गुरुङले भन्सार कर्मचारी र सुरक्षाकर्मीलाई सिम क्षेत्रको सुरक्षा मजबुद पार्न र सेवा प्रवाह छिटो छरितो गर्न निर्देशन दिए।
गृहमन्त्रीको भ्रमणले सुरक्षाकर्मीको मनोबल बढेको इलाका प्रहरी कार्यालय टिमुरेका प्रहरी निरीक्षक विक्रम कुवरले बताए।
यसैबीच, शनिबार साँझदेखि भोटेकोसीमा हराइरहेका विद्युतीय ईभी भ्यानका चालकको खोजी कार्य तीव्र पारिएको छ। राजधानीबाट गोताखोरको टोली आएर खोजीमा जुटेको प्रमुख जिल्ला अधिकारी नरेन्द्र परियारले जानकारी दिए।
