रौतहट भारतीय कुखुरा तस्करीको मुख्य केन्द्र बनेपछि स्थानीय किसानहरू आन्दोलनमा उत्रिएका छन्।
जिल्ला कुखुरा व्यवसाय किसान संघको नेतृत्वमा गौरमा विरोध प्रदर्शन भयो। किसानहरूले ‘किसानलाई सास्ती, तस्करलाई मस्ती’ भन्दै नारा लगाए।
घन्टाघरस्थित मुख्य चौकीबाट सुरु भएको र्याली जिल्ला प्रशासन कार्यालयसम्म पुग्यो। प्रदर्शनकारीले हातमा कुखुरा बोकेर बजार परिक्रमा गर्दै तस्करीविरुद्ध चर्का नाराबाजी गरे।
प्रदर्शनकारी किसानका अनुसार, व्यापारीहरूले भारतबाट सस्तो कुखुरा भित्र्याउँछन्। त्यसलाई नेपाली उत्पादन भन्दै बजारमा बेच्छन्। यसले स्वदेशी उत्पादनको बजार संकुचित गरेको छ। किसानहरू आर्थिक संकटमा परेका छन्।
संघका सचिव राधेश्याम साहले रौतहट कुखुरा तस्करीको मुख्य केन्द्र बनेको दाबी गरे। उनले तस्करी नरोकिए किसान व्यवसाय छोड्न बाध्य हुने चेतावनी दिए।
संघका अध्यक्ष उमाशंकर साहका अनुसार, तस्करी नियन्त्रणका लागि प्रशासनलाई पटक–पटक ज्ञापनपत्र बुझाइयो। तर, प्रभावकारी कदम चालिएन। र्यालीपछि किसानहरू जिल्ला प्रशासन कार्यालय अगाडि एक घण्टा धर्नामा बसे।
उनीहरूले सीमा क्षेत्रमा कडा निगरानी, अवैध आयात नियन्त्रण र स्वदेशी किसानको संरक्षण माग गरे।
अवैध व्यापार नरोकिए स्थानीय कुखुरा व्यवसाय पूर्ण रूपमा धराशायी हुने किसानले चेतावनी दिए। प्रशासनले भने विषय गम्भीर रहेको भन्दै आवश्यक पहल गर्ने आश्वासन दियो।
