बिहीबारदेखि परेको अविरल वर्षाले देशभरका दर्जनौं सडक अवरुद्ध भएका छन्। नेपाल प्रहरीका अनुसार देशका विभिन्न भागमा बाढी तथा पहिरोका कारण मुख्य र सहायक राजमार्गहरू पूर्ण वा आंशिक रूपमा ठप्प भएका छन्।
मौसमजन्य जोखिम न्यूनीकरणका लागि प्रहरी प्रशासनले काठमाडौं उपत्यका, कोशी, बागमती, गण्डकी र लुम्बिनी प्रदेशका धेरै जिल्लामा रात्रिकालीन सवारी साधनको आवागमनमा पूर्ण रोक वा नियन्त्रण लागू गरेको छ।
काठमाडौं उपत्यका र बागमती प्रदेशमा, ललितपुरको वाग्मती गाउँपालिका-३ भट्टेडाँडास्थित पाण्डुर र गोदावरी नगरपालिका-६ बिसुँधारामा पहिरो जाँदा कान्तिलोकपथ सडक पूर्ण रूपमा अवरुद्ध भएको छ। काभ्रेको रोशी गाउँपालिका-८ किन्तिबेसी र मकवानपुरको भिमफेदी गाउँपालिका-८ बगुवा खोलामा पहिरो खस्दा बिपी राजमार्ग र कान्तिलोकपथ ठप्प भएका छन्।
धादिङको बेनीघाट रोराङ गाउँपालिका-७ कृष्णभिर र गजुरी गाउँपालिका-२ परेवा भिरमा पहिरोका कारण पृथ्वी राजमार्ग पूर्ण अवरुद्ध छ। ज्यावडखोलामा पहिरो हटाएर एकतर्फी यातायात सुचारु गरिएको प्रहरीले जनाएको छ। मकवानपुरको हेटौँडा उपमहानगरपालिका-१९ नेवारपानीमा पहिरोका कारण महेन्द्र राजमार्ग पूर्ण अवरुद्ध भएको छ।
चितवनको नारायणगढ-मुग्लिन सडक खण्डमा आवागमन पूर्ण बन्द गरिएको छ, भने इच्छाकामना गाउँपालिका ४ धारापानीमा साना सवारी र मोटरसाइकल मात्र सञ्चालन गर्न सकिने अवस्था छ। नुवाकोटको टोखा-छहरे सडक खण्डमा राति १० बजेदेखि बिहान ५ बजेसम्म सवारी सञ्चालनमा रोक लगाइएको छ। काभ्रे, सिन्धुली, मकवानपुर, दोलखा र सिन्धुपाल्चोकका मुख्य तथा भित्री सडकहरूमा पनि तोकिएको रात्रिकालीन समयमा सवारी साधन चलाउन प्रतिबन्ध लगाइएको छ।
कोशी प्रदेशमा, ओखलढुङ्गाको मानेभञ्ज्याङ गाउँपालिका-६ र ७ को सिमानास्थित भँडारे खोलामा बाढी आउँदा सिद्धिचरण लोकमार्ग अवरुद्ध भएको छ। पाँचथरको तुम्बेवा गाउँपालिका-२ नावाखोलामा बाढीले तमोर-कोरिडोरलाई पूर्ण रूपमा अवरुद्ध पारेको छ। सोलुखुम्बु जिल्लामा भारी वर्षाको पूर्वानुमानले गर्दा साँझ ६ बजेदेखि बिहान ६ बजेसम्म अत्यावश्यक बाहेकका सवारी साधन र पैदल यात्रुको आवतजावतमा रोक लगाइएको छ। इलाम जिल्लामा मेची राजमार्ग र मेची कोरिडोर लगायतका सडकहरूमा रात्रिकालीन आवागमन बन्द गरिएको छ। भोजपुरमा अत्यावश्यक सवारी साधनहरू प्रहरीको समन्वयमा मात्र सञ्चालन गर्न पाइनेछ।
गण्डकी प्रदेशमा, मनाङको नासो गाउँपालिका-३ खोत्रोमा पहिरोका कारण चामे-बेशिसहर सडक खण्ड पूर्ण अवरुद्ध भएको छ। बेशिसहर-खाडसार सडक खण्डमा साँझ ५ बजेदेखि बिहान ६ बजेसम्म सवारी सञ्चालनमा रोक लगाइएको छ। कास्की, मुस्ताङ, पर्वत, म्याग्दी र नवलपरासी पूर्व जिल्लामा पनि बेलुका ६ बजेदेखि बिहान ६ बजेसम्म रात्रिकालीन सवारी साधन आवतजावतमा रोक लगाइएको छ।
लुम्बिनी प्रदेशमा, पाल्पाको तानसेन नगरपालिका १३ बैकुण्ठे भीरमा पहिरो जाँदा कालीगण्डकी करिडोर पूर्ण अवरुद्ध भएको छ। रोल्पाको रोल्पा नगरपालिका-७ माडिचौरस्थित मदन भण्डारी राजमार्गमा सवारी आवतजावत पूर्ण रूपमा बन्द गरिएको छ। राप्ती राजमार्ग (तुलसीपुर-कपुरकोट), भालुवाङ-चकचके, भालुवाङ-गनाहा खोला तथा घोराही-होलेरी र घोराही-मुर्कुटी सडक खण्डहरूमा पनि रात्रिकालीन सवारी साधन आवागमनमा पूर्ण रोक लगाइएको छ।
कोशी प्रदेश प्रहरी कार्यालयका प्रवक्ता एसएसपी योगेन्द्र सिंह थापाका अनुसार प्रदेशका पहाडी जिल्लाहरूमा वर्षाका कारण ग्रामीण सडक खण्डहरू अवरुद्ध भए पनि हालसम्म कुनै मानवीय वा ठूलो भौतिक क्षति नभएको बताएका छन्। कोशी राजमार्गको अवस्था सामान्य रहेको छ भने इलामको राजदुवाली खण्डमा सतर्कता अपनाइएको छ। सप्तकोशी नदीमा पानीको बहाब बढेको छ र कोशी ब्यारेजका २३ ढोका खोलिएका छन्।
