रोल्पाको थबाङ गाउँपालिका–५ बोटलबारामा पहिरोले घरसहित गोठ पुरिँदा १८ वर्षीया शान्ति पुन मगर र ६० वर्षीय कमलबहादुर पुन मगरको मृत्यु भएको छ। दुई जना घाइते भएका छन्।
जिल्ला प्रहरी कार्यालयका अनुसार घाइते हुनेमा २२ वर्षीय हिमाल पुन मगर र २५ वर्षीय सञ्जय घर्ती मगर छन्।
साउन २७ गते दिउँसोदेखि परेको अविरल वर्षाले पहिरो निम्त्याएको थियो। राति घटनास्थलमा पुगेको प्रहरी टोली र स्थानीयवासीको सहयोगमा घाइतेहरूको उद्धार गरी स्वास्थ्य संस्थामा पठाइएको छ। घाइतेहरूको अवस्था गम्भीर रहेको जनाइएको छ।
प्रहरीको प्रारम्भिक अनुमान अनुसार पहिरोले छ घर/गोठमा क्षति पुगेको छ। घटनाको थप विवरण आउन बाँकी रहेको प्रहरीले जनाएको छ।
