साल्ट ट्रेडिङ कर्पोरेसनसँग ३९ हजार मेट्रिक टन रासायनिक मल मात्र मौज्दात छ। चालु आर्थिक वर्षमा १ लाख २६ हजार मेट्रिक टन मल बिक्री भएको थियो।
कृषि, सहकारी तथा प्राकृतिक स्रोत समितिको बैठकमा कर्पोरेसनका नायब प्रमुख कार्यकारी अधिकृत कुमार राजभण्डारीले अन्तर्राष्ट्रिय संकट, बजेट अभाव र बन्दरगाह क्षमता समस्याले पर्याप्त आयात रोकेको बताए।
उनले हरेक वर्ष पुस महिनामै खरिद प्रक्रिया सुरु गर्दा पनि बजेट रकमका आधारमा विनियोजन हुने गरेको गुनासो गरे। ‘सरकारले ६ लाख टन मल तोक्यो भने सोही अनुसार बजेट चाहियो। तर रकम तोकिँदा आउने परिमाण सधैं कम हुन्छ,’ उनले भने।
आर्थिक वर्ष २०८३/८४ का लागि कृषि मन्त्रालयले करिब २० अर्ब रुपैयाँमा ९५ हजार मेट्रिक टन मल खरिद प्रक्रिया अघि बढाएको छ। यसमा ३० हजार टन डीएपीको सम्झौता भयो। ३० हजार टन युरियाको टेन्डर प्रक्रियामा छ। थप ३० हजार टनको प्राविधिक प्रस्ताव खोलिएको छ।
राजभण्डारीका अनुसार आगामी वर्षका लागि ५ हजार टन मल आइसकेको छ। थप ३० हजार टन असार महिनामै आउनेछ। उनले बजेट व्यवस्थापनका लागि सम्बन्धित निकायलाई पहल गर्न आग्रह गरे।
विगत केही वर्षको तथ्यांकले मल आपूर्ति सुधारोन्मुख देखाउँछ। किसानले मागे जति मल नपाए पनि पूर्ण रूपमा मलविहीन भने छैनन्।
