काठमाडौं । नेपाल सरकारको तर्फबाट सरकारी बैंकहरूमा प्रतिनिधित्व गर्ने सञ्चालकहरूले राजीनामा दिएका छन्। राष्ट्रिय वाणिज्य बैंक र कृषि विकास बैंकका अध्यक्ष तथा सरकारी प्रतिनिधि सञ्चालकहरूले राजीनामा बुझाएका हुन्।
राष्ट्रिय वाणिज्य बैंकका सञ्चालक देवकुमार ढकालले बुधबार राजीनामापत्र बुझाएको बताए। सरकारलाई सहयोग होस् भन्ने उद्देश्यले राजीनामा दिएको उनको भनाइ छ। उनीसँगै अन्य सञ्चालकहरूले समेत बुधबार राजीनामा दिएका छन्।
कृषि विकास बैंकका अध्यक्ष डिमप्रसाद पौडेल र अर्थ मन्त्रालयका तर्फबाट प्रतिनिधित्व गर्ने सञ्चालकहरूले पनि बुधबार राजीनामा बुझाएका छन्। बैंकका कम्पनी सचिव हिमलाल पौडेलले अध्यक्षसहित अर्थ मन्त्रालयबाट प्रतिनिधित्व गर्ने सञ्चालकहरूले राजीनामा दिएको जानकारी दिए।
साधारण सेयर जारी गरेका बैंकहरूमा सेयरधनीको तर्फबाट नियुक्त भएका र स्वतन्त्र सञ्चालकले भने राजीनामा दिएका छैनन्। नेपाल बैंकका सञ्चालकहरूको राजीनामा आउन बाँकी छ, यद्यपि उनीहरूले पनि राजीनामा दिने प्रतिबद्धता जनाइसकेको बताइएको छ।
