सर्लाहीमा दीपावलीको रात २६ जुवाडे पक्राउ, करिब १० लाख रुपैयाँ नगद बरामद

दीपावलीको राति सर्लाहीमा जुवा तथा तास खेलिरहेको अवस्थामा २६ जनालाई पक्राउ गर्दै प्रहरीले करिब १० लाख रुपैयाँ नगद बरामद गरेको छ। सदरमुकाम मलंगवा–८ र ब्रह्मपुरी गाउँपालिकाका विभिन्न स्थानमा गरिएको छापामारीबाट जुवा खेल्न प्रयोग हुने सामग्रीसमेत नियन्त्रणमा लिइएको हो।

जिल्ला प्रहरी कार्यालय सर्लाहीका अनुसार, पक्राउ परेकाहरूबाट ९ लाख ४९ हजार ९८५ रुपैयाँ नेपाली नगद र ३१ हजार ५० रुपैयाँ भारतीय रुपैयाँ बरामद भएको छ। सर्लाहीका प्रहरी प्रवक्ता प्रहरी नायव उपरीक्षक वेदप्रसाद गौतमले पक्राउ परेकाहरूमाथि आवश्यक कानुनी प्रक्रिया अगाडि बढाइएको जानकारी दिएका छन्।

मलंगवा र ब्रह्मपुरीबाट बरामद रकमको विवरण

प्रहरी नायव उपरीक्षक गौतमका अनुसार, मलंगवा नगरपालिका–८ स्थित भागनारायण चौधरीको घरमा छापा मार्दा ९ जनालाई नियन्त्रणमा लिइएको थियो। उक्त स्थानबाट ६ लाख ३० हजार १६० रुपैयाँ नेपाली, ३० हजार २५० रुपैयाँ भारतीय नोट, तीन बुक तास र २५ थान मोबाइल फोन बरामद भएको छ। पक्राउ पर्नेमा मलंगवा नगरपालिका, गोडैता नगरपालिका तथा भारतीय क्षेत्र सोनवर्षाका बासिन्दासमेत रहेका छन्।

यस्तै, ब्रह्मपुरी गाउँपालिका–२ स्थित धनेस साहको कुखुरा फार्म र सन्तोष साहको घरमा छुट्टाछुट्टै छापामारी गरी १७ जनालाई पक्राउ गरिएको छ। कुखुरा फार्मबाट १ लाख १५ हजार ८९५ रुपैयाँ नेपाली, ६०० रुपैयाँ भारतीय नगद, १ लाख ३० हजार रुपैयाँ उल्लेख भएको माछापुच्छ्रे बैंकको चेक तथा तीन बुक तास बरामद भएको प्रहरीले जनाएको छ। सन्तोष साहको घरबाट २ लाख ३ हजार ९३० रुपैयाँ नेपाली, २०० रुपैयाँ भारतीय नगद, छ थान डाइस तथा तासका बुक बरामद गरिएको थियो।

जुवा सम्बन्धी कानुनी व्यवस्था

नेपालमा जुवा खेल्ने वा खेलाउनेलाई मुलुकी अपराध संहिता, २०७४ को दफा १२५ अनुसार पहिलो पटक तीन महिनासम्म कैद वा ३० हजार रुपैयाँसम्म जरिवाना हुने व्यवस्था छ। दोस्रो पटकको कसूरमा एक वर्षसम्म कैद र ५० हजार रुपैयाँसम्म जरिवाना हुन्छ भने त्यसपछिको कसूरमा पटकैपिच्छे थप तीन महिनासम्म कैद र १० हजार रुपैयाँसम्म जरिवाना हुने कानुनी व्यवस्था रहेको छ।

जुवा खेल्न प्रयोग भएको साधन र जुवा खालमा प्राप्त सम्पूर्ण चलअचल सम्पत्ति जफत हुने कानुनी व्यवस्था छ। यद्यपि, जुवा खेलेको घर, कोठा, ठाउँ वा सवारी साधन जफत हुँदैन।