शीतलनिवासबाट जेनजी आन्दोलनका क्रममा चोरी भएका दुई थान हात्तीका दाह्रासहित पाँच जना पक्राउ परेका छन्। काठमाडौं उपत्यका अपराध अनुसन्धान कार्यालयले मनमैजु क्षेत्रबाट उनीहरूलाई पक्राउ गरेको हो। पक्राउ परेकाहरूको साथबाट हात्तीका दाह्राका चार टुक्रा र लागूऔषध ट्रामाडोल बरामद भएको Nmkhabarलाई स्रोतले पुष्टि गर्यो।
प्रहरीका अनुसार पक्राउ पर्नेमा राजीव महर्जन (२५), टेकप्रसाद गुरुङ (२६), आयुष महर्जन (२७), पुरन बोहरा (२४) र सन्तबहादुर भुजेल (२०) छन्। यी दाह्रा गत भदौ २३–२४ गतेको जेनजी आन्दोलनका क्रममा राष्ट्रपति कार्यालयमा भएको तोडफोड र आगजनीका बेला चोरी भएका थिए। अनुसन्धानमा बरामद दाह्रा शीतलनिवासको भित्तामा सजाइएका नै भएको खुलेको छ।
पक्राउ परेका व्यक्तिहरूमाथि राष्ट्रिय निकुञ्ज तथा वन्यजन्तु संरक्षण ऐन र लागूऔषधसम्बन्धी कसुरमा थप अनुसन्धान भइरहेको प्रहरीले जनाएको छ।
