समस्याग्रस्त सहकारी व्यवस्थापन समितिले शिव शिखर बहुउद्देश्यीय सहकारी संस्थाका २१६ जना साना बचतकर्ताको बचत फिर्ता गरेको छ। समितिले आज थप २१६ जना बचतकर्तालाई रकम फिर्ता गरेको हो। समस्याग्रस्त सहकारीबाट असुलिएको ऋणको रकम पीडित बचतकर्तालाई वितरण गर्ने कार्य अगाडि बढेको छ।
समितिका अनुसार, कूल ७६ हजार बचतकर्ताको करिब रु. ४६ अर्ब बचत फिर्ता गर्नुपर्नेछ। यसमध्ये अधिकांश साना बचतकर्ता छन्। रु. ५ लाखभन्दा कम बचत गर्नेलाई साना बचतकर्ता र सोभन्दा बढी बचत गर्नेलाई ठूला बचतकर्ताको रूपमा वर्गीकरण गरिएको छ। कूल ७६ हजार बचतकर्तामध्ये १८ हजार जनाको मात्र रु. ५ लाखभन्दा बढी बचत रहेको समितिले जनाएको छ।
समितिका अनुसार, हालसम्म १,३१३ जना साना बचतकर्ताले आफ्नो बचत फिर्ता पाइसकेका छन्।
