कञ्चनपुरको शुक्लाफाँटा नगरपालिका-९ मा बुधबार राति आएको भीषण हावाहुरीले ८० परिवारको जनजीवन तहसनहस पारेको छ। घरका छाना उडाएको, अन्नपात भिजाएको र विद्युत् संरचनामा ठूलो क्षति पुर्याएको छ।
स्थानीयवासी महेश जोशीका अनुसार हुरीले खाना पकाउने तयारी गरिरहेका बेला घरको छाना उडाएको थियो। अन्नपात र लुगाफाटा भिजेका थिए। ज्यान जोगाउनमै व्यस्त हुनुपरेको थियो। अहिले खुला आकाशमुनि बस्न बाध्य छौँ, जोशीले पीडा सुनाए।
वडाध्यक्ष रमेशबहादुर ऐरका अनुसार हुरीले ६० घर र २० गोठमा क्षति पुर्याएको छ। अधिकांश घरका जस्तापाता र टायलका छाना उडेका थिए। त्यसलगत्तै परेको वर्षाले घरभित्रका खाद्यान्न कामै नलाग्ने बनाएको छ।
कतिपय परिवार आफन्तकोमा आश्रय लिएर बसेका छन्। केही परिवार अझै अस्थायी व्यवस्थामा खुला आकाशमुनि बसिरहेका छन्।
हुरीले विद्युत् संरचनामा पनि ठूलो क्षति पुर्याएको छ। वडाका विभिन्न स्थानमा १८ वटा विद्युत् पोल ढलेका छन्। २०० केभीएको ट्रान्सफर्मर जडित पोल ढलेपछि दुई दिनदेखि उक्त क्षेत्रमा विद्युत् सेवा अवरुद्ध भएको छ।
वडाभरि जडान गरिएका पाँच वटा सिसिटिभी क्यामेरा पनि क्षतिग्रस्त भएका छन्। करिब डेढ किलोमिटर क्षेत्रमा सिसिटिभीका तार चुँडिएका छन्। केही घर र विद्यालयमा रुख ढलेर पनि क्षति पुगेको छ।
क्षतिग्रस्त क्षेत्रमा विद्युत् सेवा पुनःस्थापनाका लागि नेपाल विद्युत् प्राधिकरणका प्राविधिक टोली परिचालन गरिएको छ। मौसमले साथ दिएमा भोलिसम्म विद्युत् सेवा सञ्चालनमा ल्याउने प्रयास भइरहेको वडाध्यक्ष ऐरले जानकारी दिए।
प्रहरी र स्थानीय जनप्रतिनिधिको टोलीले क्षतिको विवरण संकलन गर्न मुचुल्का तयार पार्ने काम सुरु गरेको छ। प्रभावित परिवारको तथ्यांक संकलन गरी राहत र पुनःस्थापनाका लागि आवश्यक प्रक्रिया अघि बढाइएको छ। केही मिनेट चलेको हुरीले वर्षौँको मेहनतले बनाएको संरचनामा ठूलो क्षति पुर्याएको छ। न्यून आय भएका परिवार बढी प्रभावित भएका छन्। स्थानीय तहले प्रदेश र सङ्घीय सरकारसँग समन्वय गरी राहतको पहल गर्ने जनाएको छ।
