सिन्धुपाल्चोकमा ५६ लाख ७० हजार रुपैयाँ बराबरको भेपसहित ७ जना पक्राउ परेका छन्।
भोटेकोशी गाउँपालिका–३ गन्जेखोलाबाट १ हजार ६ सय २० थान भेप बरामद भएको छ।
सिन्धुपाल्चोक प्रहरीका सूचना अधिकारी डिएसपी जेसी शाहका अनुसार चीनबाट भित्री बाटो हुँदै भेप नेपाल भित्र्याइएको थियो। कोदारी राजमार्ग प्रवेश गर्ने क्रममा विशेष सूचनाका आधारमा चेकजाँच गर्दा उनीहरू पक्राउ परे।
पक्राउ पर्नेमा भोटेकोशी गाउँपालिका–४ का रामबहादुर विक (४८), हिमाल खड्का (४६), मंगलबहादुर थामी (३७) छन्। गणेश खड्का (३५), विकास विक (२४) र विशाल रक्पाल (१७) पनि सोही ठाउँका हुन्।
यसैगरी, बाह्रबिसे नगरपालिका–५ का ४२ वर्षीय कान्छा तामाङलाई पनि प्रहरीले पक्राउ गरेको छ।
प्रहरीले पक्राउ परेका सबैलाई हिरासतमा राखेर थप अनुसन्धान गरिरहेको बताएको छ।
