डोल्पाको जुफाल एयरपोर्टमा सीता एयरको जहाज अवतरणका क्रममा दुर्घटनामा परेको छ। नेपालगञ्जबाट आएको ९एन-एजे जहाजको पछाडिको दाहिने पांग्रा धावनमार्गमा खुस्किएको हो।
जिल्ला प्रहरी कार्यालय डोल्पाका प्रहरी निरीक्षक पदम रावलका अनुसार बिहान ८:२५ बजे अवतरण गर्ने क्रममा पांग्रा बाहिर निस्किएको थियो। जहाजमा ७ विदेशी र ६ नेपाली गरी १३ यात्रु सवार थिए।
प्रमुख जिल्ला अधिकारी जुनु हमाल ढकाल र डिएसपी अनिल राज गिरीले Nmkhabarलाई पुष्टि गरे अनुसार यात्रुहरू सबै सकुशल छन्। जहाजमा कुनै ठूलो क्षति वा आगलागी भएको छैन।
दुर्घटनापछि जहाज धावनमार्गमै रोकिएको छ। यसले गर्दा अन्य उडानहरू प्रभावित भएका छन्। अवतरणका लागि आएको नेपाली सेनाको जहाजसमेत फर्किएको छ।
प्राविधिकहरूले जहाजको जाँच गरिरहेका छन्। हेलिकप्टरमार्फत प्राविधिक झिकाएर मर्मतको तयारी भइरहेको छ।
