दक्षिण-पूर्वी एसियाका अवैध अनलाइन स्क्याम सेन्टरमा फसेका ६८७ नेपालीको उद्धार गरिएको छ। परराष्ट्र मन्त्रालयले कम्बोडिया, म्यानमार, लाओस र थाइल्यान्ड सीमा क्षेत्रबाट उनीहरूको उद्धार जारी रहेको जनाएको छ।
प्रवक्ता लोकबहादुर पौडेल क्षेत्रीका अनुसार थाइल्यान्ड र म्यानमारस्थित नेपाली नियोगको पहलमा ६ सय १६ जनाको उद्धार भएको थियो। पछिल्लो दुई सातामा थप ७१ जनाको उद्धार गरिएको छ।
उद्धार गरिएकामध्ये कम्बोडियाबाट ५६२, म्यानमारबाट १११, लाओसबाट ८ र थाइल्यान्डबाट ६ नेपालीलाई स्वदेश फर्काइएको छ।
प्रवक्ता क्षेत्रीले उक्त क्षेत्रमा अझै धेरै नेपाली फसेको हुन सक्ने अनुमान गरे। नेपाली दूतावास बैंककको अनुरोधमा कम्बोडिया सरकारले १२ नेपालीको जरिबाना मिनाहा गरेको छ। थप १७२ को जरिबाना मिनाहाका लागि अनुरोध गरिएको छ।
संगठित अपराध र मानव तस्करीमा थुनामा रहेका नेपालीको रिहाइ तथा उद्धारका लागि बैंककस्थित दूतावासले पहल गरिरहेको छ। म्यानमारमा थुनामा रहेका १८ नेपालीको कैद मिनाहाका लागि पनि पहल जारी छ।
