प्रधानमन्त्री बालेन शाहले मन्त्रिपरिषद विस्तार गर्दै सुडान गुरुङलाई गृहमन्त्रीको जिम्मेवारीमा फर्काएका छन्। महावीर पुन विज्ञान, प्रविधि तथा नवप्रवर्तनमन्त्री नियुक्त भएका छन्। राष्ट्रपति रामचन्द्र पौडेलले आज दुवैलाई पद तथा गोपनीयताको शपथ गराए।
शपथ ग्रहण समारोहमा उपराष्ट्रपति, प्रधानमन्त्री, प्रधानन्यायाधीश, प्रतिनिधिसभाका सभामुख, राष्ट्रियसभाका अध्यक्ष, मन्त्रीहरु र सांसदहरुको उपस्थिति थियो।
गुरुङ यसअघि पनि गृहमन्त्री थिए। सम्पत्ति विवरणको विवादपछि राजीनामा दिएका उनलाई सरकारी छानबिन समितिले सफाइ दिएपछि पुनः नियुक्त गरिएको हो।
पुनले सुशीला कार्की नेतृत्वको सरकारमा शिक्षा, विज्ञान तथा प्रविधिमन्त्रीको भूमिका निर्वाह गरेका थिए। गत चैत ५ गतेको चुनावमा उम्मेदवार बन्न उनले मन्त्री पदबाट राजीनामा दिएका थिए।
गुरुङ गोरखा-१ बाट निर्वाचित राष्ट्रिय स्वतन्त्र पार्टी (रास्वपा) का सांसद हुन्। पुन म्याग्दीबाट निर्वाचित स्वतन्त्र सांसद हुन्।
