सुनसरीको देवानगन्जमा प्रहरीको गोली लागेर ओमप्रकाश मेहताको मृत्यु भएपछि चर्किएको आन्दोलनले उग्र रूप लिएको छ। आइतबार राति कप्तानगन्जमा भएको झडपपछि सोमबार दिनभर प्रदर्शनकारीले पूर्व–पश्चिम राजमार्ग अवरुद्ध पारे। यसपछि जिल्ला प्रशासन कार्यालय सुनसरीले राजमार्ग क्षेत्रमा अनिश्चितकालीन कर्फ्यू आदेश जारी गरेको छ।
प्रमुख जिल्ला अधिकारी बासुदेव घिमिरेले सोमबार साँझ जारी गरेको सूचना अनुसार आज राति ९ बजेदेखि अर्को सूचना नभएसम्म कर्फ्यू लागू हुनेछ। प्रशासनले इनरुवा नगरपालिका वडा नं. ३ र ६ (घोपली टोल), पश्चिम कोशी ब्यारेजको पुल, उत्तर र दक्षिणमा राजमार्गदेखि ५०० मिटर क्षेत्रसम्म कर्फ्यू लगाएको छ।
तोकिएको सिमानाभित्र आवतजावत, भेला, जुलुस, प्रदर्शन, सभा, बैठक र घेराउमा पूर्ण रोक लगाइएको छ। आदेश उल्लंघन गर्नेलाई एक हजार रुपैयाँसम्म जरिवाना र एक महिनासम्म कैद सजाय हुन सक्ने चेतावनी दिइएको छ।
प्रदर्शनकारीले लौकी, भोक्राहा र इनरुवा खण्डमा राजमार्ग अवरुद्ध गरी टायर बालेर प्रदर्शन गरेका थिए। सवारी साधनमा तोडफोडको स्थिति सिर्जना भएपछि प्रशासनले यो कदम चालेको हो। यसअघि देवानगन्ज र हरिनगराका ५ बजार क्षेत्रमा कर्फ्यू जारी थियो। राजमार्ग क्षेत्रमा कर्फ्यू लागेपछि सुनसरीको मुख्य यातायात र बजार क्षेत्र ठप्प हुनेछ।
प्रशासनले राजमार्गमा रोकिएका सवारी साधनलाई सुरक्षा घेराभित्र राखेर गन्तव्य पठाउने तयारी गरेको छ।
