सुनसरी जिल्ला प्रहरी कार्यालयले चालु आर्थिक वर्षको हालसम्म १७ हजार १५२.१४६ केजी गाँजा बरामद गरेको छ। जिल्ला प्रहरी उपरीक्षक केशवकुमार थेबेले शुक्रबार इनरुवामा आयोजित पत्रकार सम्मेलनमा यो जानकारी दिए।
प्रहरीका अनुसार यस अवधिमा एक हजार ५६३.६९ ग्राम ब्राउनसुगर, ३२ हजार ७३ पिस ट्याब्लेट/क्याप्सुल र १३० बोतल डाइलक्स डिसीसमेत बरामद गरिएको छ। लागुऔषध कारोबारको आरोपमा ६०२ जनालाई पक्राउ गरिएको छ भने ३९७ वटा मुद्दा दर्ता भएका छन्।
प्रहरीले ११२ वटा सवारीसाधन नियन्त्रणमा लिएको छ। चालु आवमा ४३६ जना फरार प्रतिवादीलाई पनि पक्राउ गर्न सफल भएको छ। पक्राउ परेकाबाट २१९ वर्ष चार महिना २८ दिन कैद सजाय र रु एक करोड ३२ लाख ३७ हजार ४७० जरिवाना असुली भएको प्रहरी उपरीक्षक थेबेले बताए।
पाँच वर्षदेखि फरार रहेका र पाँच वर्षभन्दा बढी कैद सजाय तोकिएका छ जना प्रतिवादीलाई समेत नियन्त्रणमा लिइएको छ।
यस्तै, नेपाल-भारत सीमा क्षेत्रबाट हुने अवैध भन्सार चोरी निकासी नियन्त्रणका क्रममा चालु आवमा रु तीन करोड चार लाख ४१ हजार २६० राजस्व सङ्कलन भएको छ। चोरी, तस्करीको आरोपमा २१ जना र ४५ वटा सवारीसाधन नियन्त्रणमा लिइएको छ।
सीमावर्ती क्षेत्रमा हुने आपराधिक गतिविधि र अवैध तस्करी नियन्त्रणका लागि प्रहरीले आफ्नो सक्रियता र निगरानीलाई अझ तीव्र बनाएको प्रहरी उपरीक्षक थेबेले बताए।
