यातायात व्यवस्था कार्यालय जनकपुरधामले आर्थिक वर्ष २०८२/८३ मा रु ५७ करोड १५ लाख ३० हजार ६३६ राजस्व सङ्कलन गरेको छ। कार्यालय प्रमुख वासुदेव मल्लका अनुसार यो अघिल्लो आर्थिक वर्ष २०८१/८२ को तुलनामा रु नौ करोड ५४ लाख १३ हजार ३४४ कम हो।
अघिल्लो आर्थिक वर्षमा कार्यालयले रु ६६ करोड ६९ लाख ४३ हजार ९८० राजस्व सङ्कलन गरेको थियो। गत भदौ २३ र २४ गतेको ‘जेनजी’ आन्दोलन तथा आर्थिक वर्षको अन्तिम महिनामा यातायात व्यवस्था विभागले सफ्टवेयर निर्माणमा ढिलाइ गर्दा राजस्व सङ्कलनमा कमी आएको मल्लले बताए।
आव २०८२/८३ मा मोटरसाइकल १६ हजार ९५७, बस/ट्रक १८७, टेम्पो/विद्युतीय रिक्सा एक हजार ९०२, ट्याक्टर एक हजार २२, जिप/कार २२६ गरी २१ हजार २९४ वटा नयाँ सवारी दर्ता भएका छन्। यस अवधिमा १३ हजार ३३८ जनालाई नयाँ तथा वर्ग थप गरी सवारीचालक अनुमतिपत्र वितरण गरिएको थियो।
