युक्रेनले रूसको राजधानी मस्कोमा एक वर्षयताकै सबैभन्दा ठूलो ड्रोन आक्रमण गरेको छ, जसमा एक भारतीय नागरिकसहित तीन जनाको मृत्यु भएको छ।
रुसी अधिकारीहरूले आइतबार राति भएको आक्रमणको पुष्टि गरे। रुसी सरकारी समाचार एजेन्सी ‘तास’ का अनुसार यो पछिल्लो एक वर्षको अवधिमा मस्कोमाथि भएको सबैभन्दा ठूलो हमला हो।
मस्कोस्थित भारतीय दूतावासले मृत्यु हुनेमा एक भारतीय नागरिक रहेको जनाएको छ। दूतावासका अनुसार अन्य तीन जना घाइते भएका छन्।
युक्रेनले पनि रूसमा गरिएको आक्रमणको पुष्टि गरेको छ। राष्ट्रपति भ्लोदोमिर जेलेन्स्कीले आक्रमण पूर्णतया जायज भएको बताए। उनले रूसले युक्रेनी सहरहरूमा घातक हमला गरेको उल्लेख गरे।
हालै रूसले युक्रेनको राजधानी किएभमा ठूलो मात्रामा ड्रोन र मिसाइल हमला गरेको थियो। उक्त हमलामा परी २४ जनाको मृत्यु भएको थियो।
