सिन्धुपाल्चोकसहित २९ जिल्लामा आज आकस्मिक बाढीको मध्यम जोखिम छ। जल तथा मौसम विज्ञान विभागको बाढी पूर्वानुमान महाशाखाले आइतबार बिहान यो बुलेटिन जारी गर्यो।
महाशाखाका अनुसार कोशी, नारायणी, बागमती, कर्णाली, महाकाली र यिनका सहायक नदीको बहाव सतर्कताभन्दा तल छ। कन्काई, कमला, बबई, पूर्वी राप्ती र पश्चिम राप्ती नदीको अवस्था पनि त्यही छ।
तर, सिन्धुपाल्चोक, रसुवा, नुवाकोट, गोरखा, धादिङ, काठमाडौँ, भक्तपुर, ललितपुर, काभ्रेपलाञ्चोक, मकवानपुर, तनहुँ, लमजुङ, कास्की, पर्वत, म्याग्दी, बागलुङ, स्याङ्जा, पाल्पा, जाजरकोट, रुकुम पश्चिम, सुर्खेत, बाँके, बर्दिया, बैतडी, डोटी, डडेल्धुरा, कैलाली र कञ्चनपुरका साना नदीहरूमा बहाव बढ्नेछ। यी नदीहरूमा आकस्मिक बाढी आउन सक्नेछ।
भोलि र पर्सि गण्डकी, लुम्बिनी र सुदूरपश्चिम प्रदेशका नदीहरूमा पनि बहाव आकस्मिक रूपमा बढ्न सक्नेछ।
