ताप्लेजुङको ओलाङचुङ्गोला नाका कोभिड-१९ महामारीपछि पुनः सञ्चालनमा आएको छ। नायब सुब्बा प्रदीप धिताललाई प्रमुख तोकिएसँगै बिहीबारदेखि नाकाको नियमित कारोबार सुरु भएको हो।
फक्ताङलुङ गाउँपालिका–७ का वडाध्यक्ष छेतेन लामाका अनुसार यसअघि स्थानीय कार्यालय सहयोगीको भरमा सञ्चालन हुँदै आएको भन्सार कार्यालयमा धिताललाई प्रमुखको जिम्मेवारी तोकिएको छ।
ओलाङचुङ्गोला नेपालको पूर्वी क्षेत्रमा चीनको स्वशासित क्षेत्र तिब्बतसँग जोडिएको सबैभन्दा छोटो व्यापारिक मार्ग हो। ओलाङचुङ्चुगोलाबाट २४ किलोमिटरको दूरीमा नेपाल–चीन सीमाको टिप्ताला नाका पर्छ।
स्थानीय जनप्रतिनिधिहरूले करिब ४० वर्ष पुरानो भन्सार कार्यालयको भवन जीर्ण अवस्थामा पुगेको बताएका छन्। उनीहरूले आगामी आर्थिक वर्ष २०८३/८४ को बजेटमार्फत नयाँ भवन निर्माण र आवश्यक सामग्री व्यवस्थापनका लागि अर्थ मन्त्रालय र भन्सार विभागमा अनुरोध गरेका छन्।
सडक सञ्जालसँग जोडिएपछि ओलाङचुङ्गोला नाकाबाट नियमित राजस्व सङ्कलन हुने अपेक्षामा स्थानीयवासी उत्साहित भएका छन्।
